الشاعر /احمد محمد الحسن عثمان

ليا سنين مجافى الحب وليهو فى قلبى ما فى مكان
لانو الحب فى مفهومى مراهقة وسوسة شيطان
كلام فارغ ما بعدوا كلام .. ركاكة و دربكة صبيان
يعنى شنو ان بقيت حبيت ولا قيت الفجر سهران
وبكرة صبحت اتغزلت فى روعة حسد فتان
اية لمعة خدود وعيون واية طرفا كحيل نعسان
وياتو هدف حتوصل ليهو فى بسمة وبريق اسنان
محال انا تانى يجذبنى صدير عالى ونهد رمان
ولا بلقيس تهز عمقى ولا تاجوج ولا سوزان
ولا نظرة غزال جافل ولا نفرة ظبى خجلان
كبرت عتيت على الرعشات وفت مراحل الخفقان
عندى مناعة ضد الحب جيش من انجليز والمان
تجارب من حبوط واحباط اميال من اسى واحزان
الحب فره من قلبى ومن اعماقى طار طيران
طبعا هو ماب ينشاف عشان لو شفتو اكون عميان
اما اذا سمعت اسمو احس بالطامة والغثيان
قلبى يدق راسى يدوش …. دمى يفور يزيد غليان
وحاتكم تانى ما ب اسمع اتم فوق كم سنين طرشان
الحب فى دواخلى رماد هوامش كفته النسيان
خرافات من حجى وتدجيل اساطير غابر الازمان
الحب فى قلب غافل فاقد فى حياتو حنان
الحب فى ضمير ساذج عانى مرارة الحرمان
الحب مصلحة وصفقات احلام ماها بالامكان
الحب فى مكان شيكات وتوب مضغوط وكم كردان
الحب يستحيل يصدق مع زولا شقى وعدمان
الحب جنو جن عاطل وجنو وجنو جن فلسان
الحب فى زمانا ذكى مدردح وعبقرى وشيطان
لابيعرف كلام معسول ولا صوتا شجى ورنان
او كونك تموت مشنوق او تتقله فى نيران
الحب حبو فى المليان ….. عمارة ورحلة لى اسوان
عربتين وكم مكتب تلفون خط مع اليابان
دفتر بنك فى طبلون عربه معاها كم دكان
الحب يا عوير فتح…. حليل ايام زمن عميان
ايام كنت لما تشوفا تتقطر حيا وخجلان
همها لو لقت قوت يومه تحمد تشكر ا لرحمن
حلمها بى طفل طفلين يمرحو داخل الحيشان
بى طورية. بى منجل .. بى جدول وسط حيضان
بى كورية بى بستله بى نعجة بى ضرع مليان
بى طايوقه بى بزديق بى دوكة ودقيق خمران
وهسه الحب مع البوتجاز وكم تلاجة فى الديوان
وكم خاتم من الياقوت وكم سلسل من المرجان
وكم وصفات وكم وجبات من امريكا او لبنان
الحب دايرو؟ ما تصدق كون كاذب بالف لسان
كون دجال وكون محتال بتاع شره وبتاع زوغان
حزارى الحب تجيهو عديل دايرو تعالو بالدوران
لكن رغم ماقلتو وما سطرتو من اوزان
ورغم قناعتى التامة بانو الحب ضياع ازمان
حاسى الليله يا زينوبه من شفتك بقيت هيمان
ظهرتى عليا زى حوريه لكن فى شكل انسان
وزى عصفورة فوق زيتونه تتما يلبها الاغصان
وزى قمريه فوق نخلة تشدو باعذب الالحان
انتى جديا يازينوبه سارحه فى خدرة الوديان
بشوف قوقك سحابه وغيمه والعشب النضير تريان
بشوفك قوس قزح زينوبه خاتفى معاك كم الوان
زدتى على الشمس اشراقه خليتى البدر خجلان
بددتى الظلام والله دوبتى الدجن دوبان
عيونك ذنبقة … وخدك يشابه زهرة الرمان
ويضوى جبينك الساطع يعكس روعة الغدران
رقيقه رشيقه فتانه وديعه وداعه الغزلان
عرفت المحنه يوم شفتك ولى هذا الوكت محنان

شايقية /الشاعر احمد محمد الحسن عثمان

ثلاتة خدود على الخدين
شلوخ جذابة سحرية
عيون مقرونة الحاجب
حادة النظرة عسلية
شعر نازل على النهدين
تتمناه هندية
نظرت ليا وابتسمت
ابتسمت بكل ما فيا
حتى عواطفى ابتسمت
وحتى مفاصل ايديا
وحتى عروقى من جووووووه
وحتى مضافر اصابعيا
سالتها انتى من كسلا ؟
قالت لا الشمالية
قلت تكونى من شندى ؟
قالت مانى جعلية
قلت تكونى من دلقو ؟
قالت يعنى محسية ؟
قلت اذا من القو لد ؟ وجنسك دنقلاوية
قالت ما عرفتو احشا نسيت تقولى شايقية

الشاعر احمد محمد الحسن له قصيده رائعه يسال فيها القمرة عن احوال البلد كدى النقراها مع بعض
القمـــــــرة
طلبتك بالله يا القمره
تشوفى ليا كيف بالله ناس حلتنا فى الليل ده
وتشوفى ليا ناس حلتنا عد يتعشو واللا يغنوا
واللا مكومين يتحاجوا فى الرمله
آى طلبتك با الله يا القمرة
وانا مشتاق ..وزى ما عارفه يا القمره لى سنين فى نار الغربة اتقله
ونار الغربة زى ماك عارفة يا القمره
شوق يومين تهرد الزول وكيف للفيها سبعة سنين بنات حفرة
آه من شوقى يا القمره
آه من قلبى من اوجاعو من جواهو لما تمر بى الذكرى
اسرعى شوفى ياالقمره
وقبل ما تشوفى ارخى اضانك السمره
اسمعى ليا ايه بيقولو عن احبابم الشعراء
فى حجواتن ايه بيقولو ناس امونه ناس علوية ناس زينوبه ناس السيدى والزهرة
اذكرت يا القمرة فاطنى السمحى من حجاويهم ومن اشعارهم البت البيلصف بالسواد شعره
ارخى اضانك آ القمره
اسمعى لي صوت اطفالنا فى لياليهم الساره
لما يضجو لما يوجو لما يكوركو زى طير العشية الراكى فى الشجره
لما يغنو لى ليلك ... بسحب الكاف وكسر اليا
حليييييييل ايام براءتنا وداعه وجهنا السمره
ايام كنا من جدول نعوم فى النيل ونطلع نخرط النخله
ومرات نلعب الطقاش ومرات نلعب الحفره
ومرات نلعب الشراب وسيجة ونط كلب مره
وصفرجت آحليل واحله حليل الطق يا عبدالله
تذكرت وكت كنا نشيل اشراكنا نندله
نكوس الدود من البتق نقد العيشه بالابره
نبارى الطير نشركلو وندودرو بشييييشى نمشى ورا
حليل ايام جبابيدنا المتينه اوتادها فى الحجره
نرميها وقبل ما نمشى نشبك خيته بى قفرا
ونمشى نفتش الجندب نجيبوا طعم مع الكسره
حليل ايام براءتنا ووداعه وجهنا السمره
ايام كنا مبسوطين نغنى ونشدو بالفطره ولاب نعرف شقى الليله ولا بنشيل هموم بكره
اياك كنا بنناديك يا القمره
ايام كنا بنقول ليكى اقلبى السنسنه الحمره شوفى ابوى ما جا
ايام كنا ما عارفين ورا الايام سنسن مره
ولاعارفين فى يوم نرحل نفارق ونبكى فى حسره
طلبتك با الله يا القمره اى طلبتك با الله يا القمره
تشوفى ليا كيف با الله حال حلتنا فى الليل ده
وتشوفى لي ناس حلتنا عد يتعشو واللا يغنو
واللا مكومين يتحاجوا فى الرمله .....