بحب بلدى وبغنيلها

هبة ابنعوف الأحد أغسطس 02, 2009 1:42 pm

بحب بلدى .. وبغنيلها

احب زولا .. اشابيلها

اشيل همس الغنا

الصداح .. وادوبيلها..

بلد ملــــــــــــــيانة ..

حب وســــــــــماح

ولابسة عفافا من

نيـــــــــــــــــــــلها

نار قرانا ماخمدت

بتسمع ديمه ترتيلا

وجنياتا.. زى جمال

الشيل ..دم الحارة

لما يسيل.. كمان

شيلتنا .. بنشيلها

مابننزل وحاتك تب

نحنا صغيرنا ماقال كب

بلد بشراها .. بى ديلا

روعة كسلا بى ناسها

خرير الساقية واجراسها

حِن اطيار تقوقيلها

شوف ياخوى .. بطانة

الخير.. جمل عنافى

قدح ضيفان ..ونم وافى

كلمة تُر وعوافى

وصهيل خيلها..

جزيرة العز ..

نحاسها يرز

وبنوتا تحاكى الوز

قالو الفرقة يا حليلها

خرطوما ..تهدى

الفرحة للجايين..

صباح امدر..

تملى حنين

نجوم بحرى

ب تضويلها..

جنوبنا ..

العزة فى ناسو

غربنا الضاوى

نبراسو.. وطن

غنواتو كل ليلة

بلد غنواتها

كل .. ليلة..

**alshatrabi** الإثنين أغسطس 03, 2009 2:31 am

بلادي أنا
بلاد ناسا في أول شئ
مواريثهم كتاب الله ،
وخيل مشدود،
وسيف مسنون حداه درع،
وتقاقيبهم تسرج الليل مع الحيران
وشيخا في الخلاوي ورع
وكم نخلات تهبهب فوق جروف الساب
وبقرة حلوبة تتضرع وليها ضرع ،،،
وساقية تصحّي الليل مع الفجراوى..
يبكى الليل ويدلق في جداولو دمع
يخدر في بلادي سلام ..
خدرة شاربي موية النيل ..
تزرد في البوادي زرع
بلادي أنا بتشيل الناس وكل الناس
وساع بخيرها لينا يسع،
وتدفق مياه النيل علي الوديان
بياض الفضة في وهج الهجير بتشع،،،
بلادي سهول ،،بلادي حقول،،
بلادي الجنة للشـافوها ،أو للبرة بيها سمع ،،
بلادي أنا بلاد ناساً تكرم الضيف
وحتى الطير يجيها جيعان
ومن أطراف تقيها شبع ،،
بلادي الصفقة والطنبور ،،
وبنوتاً تحاكي الخيل
،يشابن زيي جدي الريل،
وشبالن مكنن في طريفو ودع ،،
بلادي أمان ،،بلادي حنان،،
وناسها حنان ،يكفكفوا دمعة المفجوع ،
يبدوا الغير علي ذاتهم ،
يقسموا اللقمة بيناتهم ،
ويدوا الزاد ،حتى إن كان مصيرهم جوع ،
يحبوا الدار ،
يموتوا عشان حقوق الجار ،
ويخوضوا النار عشان فد دمعة ،،
وكيف الحال كان شافوها
سايلة دموع ؟؟،،،،
ديل أهلى..
البقيف في الداره
وسط الداره
وأتنبر وأقول للدنيا ديل أهلي
عرب ممزوجة بي دم الزنوج الحارة..
ديل أهلي
ديل قبيلتي ، لما أدور أفصل للبدور فصلي..
أسياد قلبي والإحساس
وسافر في بحار شوقم زمان عقلي
أقول بعضى..
ألاقيهم تسربوا فى مسارب الروح بقو كلي
محل قبلت ألقاهم معايا، معايا زي ضلى
لو ما جيت من زي ديل..
كان ،أسفاي..
وآمأساتي..
وآذلي..
تصور كيف يكون الحال
لو ما كنت سوداني وأهل الحارة ما أهلي
تصور كيف؟