ياام دعاء اهدي ليك...

**alshatrabi** الخميس يوليو 30, 2009 6:49 pm

حتى الطيف رحل وخلاني ما طيّب لي خاطر
أما النوم أبى وجافاني وأصبح داجّي ساهر
قليل يا طيف أقيف وأرجاني وين فايتني عابر
شن حارس وراك أنا تاني ياني معاك مسافر

لا لا تقول لي كدي استناني أمشي وأجيك باكر
يبقى أنا ما ألم فيك تاني مين عارف المصاير
هاك اسمع رنين ألحاني وأبقى معاي سامر
خفف لي قليل أحزاني ياما أنا عشت صابر

شوف كيفن يسوي زماني ديمة علي جاير
آه مر العذاب وراني سهمو في قلبي غاير
شوف الليلة كيف بستاني دا الكان باشّي ناضر
من حر السموم بيعاني طيرو يفر يهاجر

جفّ يبس صبح صناني لافح حرو كافر
عدمان الضليل سواني مجنون قالوا شاعر
كل ما تمر تعدي ثواني منو اسراب تغادر
رحلوا الفيهو صر وحداني نازل ومرة سادر

أحوم أرجع أصد لبكاني مقطوع راسي حاير
وين أحبابي وين خلاني آه يا الله قادر
ما عارف العلي تراني فوق كرعي ساير
وأسكت أسوي في أوزاني أشعار مالا آخر

وإت ياطيف عليك أحزاني ليّ شوية كابر
عشان خاطر قليبي عشاني لحظات بس تخاطر

**نهى عثمان** الخميس يوليو 30, 2009 7:11 pm

جد ابدعت ده الغنا ولا بلاش

**alshatrabi** الخميس يوليو 30, 2009 7:35 pm

نهى عثمان كتب:جد ابدعت ده الغنا ولا بلاش

كلك ذوووووووووووووق

**أميرة عثمان خوجلي** السبت أغسطس 01, 2009 12:36 am

مشكور على الهدية الراقية وربنا يقدرني على ردها

**alshatrabi** السبت أغسطس 01, 2009 1:51 am

أميرة عثمان خوجلي كتب:مشكور على الهدية الراقية وربنا يقدرني على ردها

طلتك براه بالدنيا ياام دعاء

ياام دعاء اهدي ليك...

ياام دعاء اهدي ليك...

رد: ياام دعاء اهدي ليك...

رد: ياام دعاء اهدي ليك...

رد: ياام دعاء اهدي ليك...

رد: ياام دعاء اهدي ليك...